Healthy Licious page on Facebook ... Healthy Recipes

صفحة جميلة علي الفيس بوك بتنشر وصفات صحية سأقوم بنشرها هنا علي المدونة بإذن الله للاحتفاظ بها والعودة إليها دائما 

صاحبة الصفحة اسمها : سماء الصباغ 

جزاها الله خيرا 

1- الحلاوة الطحينية 

" حلاوة الطحينية" 🤩.. 

بمكونات صحية وشكل مختلف شوية.. 🍯🥥🍫 ..

حلوة جدًا للأطفال وتمشي كمان “ 💥 power-balls “ 

• المكونات : 

- نصف كوب طحينة .. (نجيبها مكونة من سمسم فقط أو نعملها في البيت عشان تكون صحية ) 

- ربع كوب عسل .. 

- كوب دقيق كامل الحبة أو دقيق جوز هند أو دقيق شوفان .. 

- رشة ملح ورشة ڤانيليا (اختياري ) 

* لو عاوزينها بالكاكاو .. هنشيل ملعقة أو أمتر من الدقيق أو الشوفان ونضيف بدالها كاكاو خام .. 

• الطريقة : 

- هندفي الطحينة .. تبقى دافية بس .. ودا بيساعد على اندماجها مع المكونات بشكل أفضل .. وهنقلبها مع باقي المكونات ( الدقيق حسب نوعه - والعسل .. ورشة الملح والڤانيليا ) 

- هنتأكد إنها كونت عجينة مش بتلزق وبتكون مفرولة شوية .. لكن لو ضغطتها بإيدي كدا بتمسك .. 

- لو بتلزق نضيف شوية من الدقيق حسب نوعه .. 

- ندوق عشان لو محتاجين نزود العسل .. نزوده ونزود شوية كمان من الدقيق..

- بنضغط المكونات ف قوالب تلج أو قوالب سيليكون بحجم صغير .. ونسيبها ساعة ف التلاجة .. وبعدين نشيلها من القوالب ونحفظها ف علبة أو برطمان .. وكدا بقت جاهزة .. 😋 

*** لو هستخدم دقيق كامل الحبة بيكون أفضل جدًا لو حمصته على النار مدة خمس دقايق نشيل منه الرطوبة ونكهة الدقيق .. 

• ملاحظات : 

* لو الجو حر الأفضل نشيلها ف التلاجة .. 

* الحلاوة دي قوامها طري مش ناشف زي الحلاوة الطحينية بس طعمها جميل وقريب منها .. وبنتحكم ف القوام لما بنزود الدقيق .. 

* أقرب طعم ليها اللي بالدقيق كامل الحبة .. 

* اللي بنعملها بدقيق الشوفان بتكون خشنة شوية .. 

* اللي بدقيق جوز الهند لطيفة وخفيفة ..

✨ من أشهر فوايد السمسم إنه مصدر غني للكالسيوم.. ومعادن مختلفة زي الزنك والحديد والمغنيسيوم .. 

والمعادن دي مجمعة مع بعض مهمة جدًا لصحة العظام .. 💪🏻

- السمسم غني بالبروتين ومضادات الأكسدة وڤيتامين B12 وفيتامين E ..

- وبيحتوي على مضادات أكسدة .. 

- وأليافه بتساعد في عملية الهضم .

وصفة الطحينة 

الطحينية " في البيت 🍽..

تفاصيلها بسيطة ومش بتاخد وقت .. 😊

• المكونات : 

- كوب سمسم ني ..

- تلات ملاعق زيت سمسم أو زيت زيتون .. 

- ملعقتين أو أكتر دقيق قمح كامل الحبة ..

• الطريقة : 

- بنحمص السمسم حوالي خمس أو سبع دقايق على نار هادية .. ونقلبه عشان ميتحرقش .. 

- بنضربه ف كبة البصل أو المطحنة لغاية ما السمسم ينزل زيوته .. ويبقى عجين شوية كدا .. ( ناخد بالنا ميكنش فيها ريحة بصل أو توابل ) 

- نزودله الزيت عشان نسهل إنه يبقى ناعم .. ملعقة بملعقة .. 

- بيكون أفضل لو نقلناه بعد المرحلة دي للخلاط .. بيخليها ناعمة جدا .. 

- لو زودنا الزيت لدرجة إن الطحينة بقت سايلة .. نبدأ نزود دقيق ملعقة بملعقة .. لغاية ما نوصل للقوام اللي نحبه .. 

- ممكن نحمص الدقيق تلات دقايق الأول ع النار عشان نشيل منه الرطوبة بيكون أفضل ف الطعم .. 

- ممكن نضيف ليها رشة ملح صغيرة .. 

- ننقلها ف برطمان أو علبة نضيفة لوقت ما نحتاجها .. ممكن نستخدمها ف سلطات الطحينة مع الأكل .. وممكن نعمل بيها الحلاوة الطحينية .. 😊

* ممكن نشتريها جاهزة بس تكون " سمسم مطحون فقط من غير أي إضافات زي الدقيق الأبيض والزيوت النباتية " بس بتكون أغلى شوية في السعر .. 😊


2- بطاطا بالبشاميل 

قالب " بطاطا بشاميل " 😋🍠
سهل جدًا وطعمه جميل ومناسب جدًا للشتا وقعدة البيت ☃️❄️..

• المكونات :
- كيلو بطاطا .. 
- كوب ونصف لبن ..
- ٣ ملاعق كبيرة دقيق قمح كامل الحبة ( ممكن نبدله بشوفان مطحون بس ممكن نحتاج نزود شوية )
- رشة فانيليا ..
- رشة ملح ..
- تقريبا ٤ ملاعق كبار دبس بلح أو عسل نحل ..
- ملعقة صغيرة قرفة / زنجبيل (حسب الرغبة )

• الطريقة :
- هنقشر البطاطا .. ونغسلها كويس ونقطعها .. ونقلب معاها ملعقتين من الدبس أو العسل .. ونغطيها بميا ( الميا تغطيها بس مش لآخر الحلة ) ونغطي على الحلة ونسيبها تستوي على نار متوسطة
- في الأثناء دي .. هندوب الدقيق كويس في كوباية اللبن .. ونرفعها على نار هادية ونفضل تقلب عشان الدقيق ميلزقش تحت أو يتكتل ..
( ممكن نعملها بطريقة الباشاميل العادي ونحمر الدقيق مع زبدة أو سمن لكن بردو بتطلع جميلة من غير الخطوة دي )
- لما الباشاميل يتقل هضيف ليه ملعقتين دبس أو عسل .. واقلب ..
- هاخد كوباية من مية سلق البطاطا اضيفها للباشاميل بالتدريج لغاية ما اوثل للقوام المطلوب .. ولما يغلوا سوا .. هرش رشة ڤانيليا واطفي النار ..
( لو حسيته تقيل أخفه بميا .. ولو خفيف ادوب ملعقة دقيق ف لبن واضيفهم )

- كدا البطاطا هتكون استوت .. هصفيها من باقي الميا .. وههرسها مع ربع كوب لبن .. ( وازود لو احتجت ) مع رشة ڤانيليا ورشة ملح..
- ممكن أضيف ليها القرفة والجنزبيل ..
- افردها ف قالب .. بحبها تكون طبقة رفيعة شوية .. وممكن نضيف مكسرات أو زبيب أو جوز الهند ونضغطهم في البطاطا..
- نفرد عليها طبقة الباشاميل .. ونساويها ..
- ندخلها الفرن نص ساعة بس .. لغاية ما المكونات تندمج والوش يحمر .. وبس كدا ..🍽🍠😋

* ممكن ناكلها دافية أو باردة ..
* يفضل قبل ما نقطعها نسيبها تبرد عشر دقايق عشان تكون متماسكة🍴 ..
* ممكن نعملها في قوالب صغيرة 🍮..

3- بسكويت الينسون 

بسكوت الينسون 🍪🌿..

( بدقيق جوز الهند 🥥)..

سهل جدًا وريحته الجميلة بتملا البيت .. ☺️😋🏡

• المكونات :

- ٣ بيضات ..

- نصف كوب دقيق جوز الهند .. 

- ملعقة طحينة أو ملعقتين من زيت الزيتون .. 

- ملعقة أو اتنين عسل أو دبس تمر .. 

- خمس ملاعق كبار لبن .. 

- رشة ملح .. 

- ڤانيليا ..

- نصف ملعقة صغير باكينج بودر .. 

- ملعقة صغيرة ينسون وملعقة صغيرة شمر .. ( ممكن نطحنهم وممكن نستخدمهم كدا.. أنا بطحن شوية وبسيب شوية )

• الطريقة :

- هنضرب البيض مع الفانيليا ورشة الملح لغاية ما حجمه يتضاعف .. ( مهم ) 

- هنضيف نص كمية الدقيق مع الباكينج بودر .. وهقلبه كويس بملعقة .. 

- هضيف العسل والطحينة أو الزيت .. وهكمل تقليب .. 

- هضيف باقي كمية الدقيق والينسون والشمر .. 

- هلاقي الدقيق تشرب السائل وبقى تقيل .. 

- هضيف من ٣ ل ٥ ملاعق كبار من اللبن .. لغاية ما العجين يبقى سايل شوية .. ( تقريبا زي الكيك )

- هبطن قالب كويس بزبدة أو طحينة ودقيق .. أو أبورق زبدة .. وممكن نرش على وشها سمسم وحبات ينسون وشمر .. 

وهدخلها فرن سخن على ١٨٠.. 

- أنا استخدمت قالب الانجليش كيك المستطيل .. عشان كنت عاوزاها تطلع رفيعة .. 

- بعد ما تستوي خالص .. بسيبها تبرد عشر دقايق .. وبعدين بقطعها شرايح بالحجم اللي نحبه .. وادخلها الفرن تاني على ١٦٠.. لغاية ما بتتحمص وتوصل للون اللي نحبه .. وكدا بقى البسكوت جاهز .. 😋🍪🌿

✨ طبيعي وهي سخنة بتكون لسه طرية شوية .. 

✨ ممكن جدًا منحمصهاش ونضاعف الكمية وناكلها كيك مش بسكوت .. بتكون حلوة جدًا .. 🍞

✨ الوصفة خالية من الجلوتين ..

✨دقيق جوز الهند ممكن نعمله بالطريقة دي : 

https://www.facebook.com/2082529095408637/posts/2087672904894256?sfns=mo

وممكن نشتري جوز هند ونطحنه .. ( بس منزودش الطحن عشان مينزلش زيوته ويعجن )

وممكن نشتريه جاهز من فروع أبو عوف ..

4- شاي الكرك

" شاي الكرك" ☕️ 😋

* شاي الكرك أصله من الهند .. واشتهرت بيه دول الخليج .. واختلفت طرق تحضيره ومكوناته وأحيانًا كمان مسمياته ..

* في الأصل شاي الكرك عبارة عن شاي بيغلى مع نكهات مختلفة زي الهيل والزعفران والقرفة والزنجبيل على نار هادئة لغاية ما تتركز النكهة وبيضاف ليه الحليب .. وبنسيبه على نار هادئة لفترة كمان ..

* والـ «كرك» معناها القوي .. نتيجة لتركيز المكونات فيه ..

• المكونات : 

- ٢ ملعقة صغيرة شاي ..

- كوب وربع ماء ..

- كوب حليب + ربع كوب ( حسب الرغبة ) ..

- ٤ حبات حبهان ( هيل ) .. 

- ٤ حبات قرنفل ..

- عود قرفة خشب ..

- قطعة زنجبيل بحجم عقلة الإصبع .. 

- ملعقة دبس تمر أو عسل نحل .. ( ممكن أكتر أو أقل حسب الرغبة )

• الطريقة : 

- هنضيف الشاي وباقي التوابل والعسل للميا .. وهنرفعهم على نار هادية .. ونسيبهم يغلوا خمس دقايق ..

- هنضيف الحليب ونسيبه يغلي معاهم خمس دقايق كمان .. 

- كدا بقى جاهز نصفيه ونقدمه .. ☕️😋

• ملاحظات : 

* ممكن نسيبه كذا ساعة أو نشيله في التلاجة لوقت التقديم .. طعمه بيتركز أكتر وبيبقى حلو أوي .. 

* ممكن نزود أو نقلل من المكونات حسب المزاج .. 

* دبس التمر في التحلية بيضيف ليه نكهة كرملة خفيفة حلوة جدًا .. 

* ممكن نضيف قطعة من الينسون النجمي وتقريبا أربع جبات من الفلفل الأسود .. 

* ممكن نزود اللبن لو النكهة كدا قوية أوي بالنسبالنا .. 

* طبعًا احنا استبعدنا إضافة الحليب المكثف أو المركز عشان نستبعد المعلبات والأغذية المصنعة أو اللي مليانة سكر..